Konstitutsiyaviy qonun loyihasida fikr yuritishni cheklash mumkinligi bilan bog‘liq normaga o‘zgartirish kiritilmoqda. Bu haqda Qonunchilik palatasi spikeri o‘rinbosari Odiljon Tojiyev ma’lum qildi.

Amaldagi Konstitutsiyamizning 29-moddasida fikr yuritish va uni ifodalash erkinligi qonun bilan cheklanishi mumkinligi belgilangan.

Konstitutsiyaning yangi tahrirdagi loyihasida esa ushbu normaga quyidagicha o‘zgartish va qo‘shimcha kiritish taklif etilmoqda:

“Har kim fikrlash, so‘z va e’tiqod erkinligi huquqiga ega. Har kim istalgan axborotni izlash, olish va tarqatish huquqiga ega.

Davlat Internet tarmog‘idan foydalanishni ta’minlash uchun shart-sharoitlar yaratadi.

Axborotni izlash, olish va tarqatishga bo‘lgan huquqni cheklashga faqat qonunga muvofiq hamda faqat konstitutsiyaviy tuzumni, xalqning sog‘lig‘i va ma’naviyatini, boshqa shaxslarning huquq va erkinliklarini himoya qilish, jamoat xavfsizligini hamda jamoat tartibini ta’minlash, shuningdek davlat sirlari yoki qonun bilan qo‘riqlanadigan boshqa sir oshkor etilishining oldini olish maqsadida zarur bo‘lgan doirada yo‘l qo‘yiladi”.

“Ya’ni, fikr yuritishni cheklash mumkinligi bilan bog‘liq noo‘rin norma chiqarib tashlanmoqda. Masalaga real qaralganida, fikr insonning ongostida yuzaga keladigan, egasining o‘zgadan boshqalarga “ko‘rinmas” g‘oya. Uni amalda nazorat qilish, cheklash yoki ta’qiqlashning imkoni yo‘q”, – deydi Tojiyev.

Qayd etilishicha, ushbu masala o‘tgan haftada bo‘lib o‘tgan mas’ul qo‘mitalar yig‘ilishida ham qizg‘in muhokama qilingan va aksariyat deputatlar taklif etilayotgan tahrirni ma’qullashini bildirgan.

• Fikr
• Konstitutsiya