O‘zbekistonga Yaqin Sharq davlatlaridan qaytarilgan fuqarolar soni 8-mart soat 07:00 da 19 347 nafarni tashkil etdi. Bu haqda TIV matbuot xizmati xabar berdi.

Ma’lum qilinishicha, 7-mart kuni Saudiya Arabistonidan 9 ta reys amalga oshirilib, 1 680 nafar, Birlashgan Arab Amirliklaridan 2 ta reys orqali 394 nafar fuqaro vatanga olib kelindi.

Shu kuni Erondan 5 nafar fuqaro ham O‘zbekistonga qaytarildi. Qatar va Saudiya Arabistonidagi elchixonalar O‘zbekiston Transport vazirligi bilan birgalikda Doha shahrida bo‘lgan O‘zbekiston fuqarolarining birinchi guruhini (208 nafar) evakuatsiya qildi.

Fuqarolari Centrum Air aviakompaniyasi reysi bilan Ar-Riyod xalqaro aeroportidan uchib, joriy yil 8-mart kuni soat 05:40 da Toshkentga sog‘-salomat yetib kelgan. Shu bilan birga, Qatardagi diplomatik vakolatxona tomonidan keyingi evakuatsiyani amalga oshirish doirasida fuqarolarning ikkinchi guruhi (126 nafar) shakllantirildi. Ular diplomatlar hamrohligida elchixona tomonidan ijaraga olingan avtobuslarda (3 ta) Doha shahridan olib chiqilib, Riyod—Toshkent yo‘nalishi bo‘yicha 8-mart kuni amalga oshiriladigan charter reysi orqali evakuatsiya qilinishi rejalashtirilgan. Ta’kidlanishicha, vatandoshlarni O‘zbekistonga qaytarish bo‘yicha chora-tadbirlar tizimli va bosqichma-bosqich amalga oshirilmoqda.

• Aviaqatnov
• O‘zbekistonlik
• fuqaro