Prezidentning tegishli qaroriga asosan, “O‘zbekiston temiryo‘llari” AJ 200 ta yo‘lovchi vagonini yangilash uchun 143 million dollar miqdorida kredit oladi.

Qayd etilishicha, mablag‘ Tiklanish va taraqqiyot jamg‘armasi tomonidan 2026—2027-yillarda 10 yil muddatga 3 yillik imtiyozli davr bilan yillik 5 foiz stavkada ajratiladi. Bu “O‘zbekiston temiryo‘llari” AJ va uning tarkibidagi korxonalar kafilligi asosida amalga oshiriladi.

Aksiyadorlik jamiyatiga lokomotiv parkini yangilash uchun 2 ta yo‘lovchi teplovoz va 10 ta elektrovoz, shuningdek, 50 ta manyovr lokomotivlarini xarid qilish loyihasi doirasida ro‘yxat bo‘yicha chetdan olib kelinadigan tovarlar tegishli muddatda import bojidan ozod etiladi. Jamiyat tarkibidagi korxonalarga qo‘shilgan qiymat solig‘ini 120 kunga kechiktirib to‘lashga ruxsat beriladi.

Qarorning asosiy maqsadi etib, 2030-yilgacha temiryo‘l transportida mahalliy yo‘nalishlarda yillik yo‘lovchi tashish ko‘rsatkichini 10,5 million nafardan 23,5 million nafarga, elektropoyezdlar qatnovi tashkil etilgan yo‘nalishlar sonini 40 tadan 53 taga yetkazish belgilangan.

• Kredit
• O‘zbekiston temir yo‘llari