Meksikada prezident Klaudiya Sheynbaumning siyosatiga qarshi namoyishlar avj oldi. Namoyishlar Uruapan shahri meri Karlos Manso otib o‘ldirilgani ortidan boshlandi. The Guardian xabar berishicha, Mexiko shahri bo‘ylab o‘tkazilgan marshlarda kamida 120 kishi, asosan, politsiya xodimlari jarohatlangan. 

Namoyishlar 15-noyabr kuni “Z avlod” vakillari tomonidan uyushtirilgan. Biroq muxolifat partiyalarining katta yoshli tarafdorlari ham ularga qo‘shilgan.

“Bu safarbarlik bir necha soat davomida tinch yo‘l bilan davom etdi va rivojlandi, ammo keyinchalik niqob taqqan bir guruh shaxslar zo‘ravonlik harakatlarini sodir eta boshladi”, – dedi Mexiko shahri xavfsizlik xizmati boshlig‘i Pablo Vaskes.

U 100 nafar politsiyachi jarohatlangani, ulardan 40 nafari ko‘karish va kesilgan jarohatlar sabab shifoxonaga yotqizilganini ma’lum qilgan. 20 nafar norozilik bildiruvchi fuqarolar ham jarohat olgan.

Sheynbaum 2024-yil oktyabr oyidan beri hokimiyatda, uning siyosatini ma’qullash reytingi 70 foizdan oshadi. Biroq bir nechta shov-shuvli qotilliklar tufayli prezidentning xavfsizlik siyosati tanqidga uchradi.

Namoyishchilar Sheynbaum yashaydigan va ishlaydigan Milliy saroy oldida to‘planib, bino atrofidagi metall to‘siqlarning bir qismini qulatgan. Majmua hududini qo‘riqlayotgan politsiya panjaralarni urayotgan namoyishchilarni ushlab turish uchun ko‘zdan yosh oqizuvchi gazlardan foydalangan.

• Meksika
• Namoyish
• norozilik
• zumerlar