Klaviatura va sichqoncha kompyuterning eng ko‘p va tez ifloslanadigan qismidir. Ularda to‘planadigan bakteriyalar miqdori eshik tutqichida yig‘ilgan mikroblardan ham ko‘proqni tashkil qiladi. Lekin buning vahima qiladigan joyi yo‘q. Chunki uni tozalashning oson yo‘llari bor. Faqat tozalash vaqtida quyidagi 4 bosqichli ishni amalga oshirish lozim. 

1-qadam: Kompyuterdan klaviatura va sichqonchani ajratib oling
 Agar siz simsiz qurilmalardan foydalansangiz, ularni o‘chirib qo‘yishingiz kerak. Noutbuk klaviaturasini dezinfeksiyalashdan oldin uni o‘chirib qo‘yishingiz lozim. Xavfsizlik nuqtai nazaridan olib qaraganda texnik qurilmalaringiz bateryalarini olish oson bo‘lsa, ularni ham chiqarib qo‘yganingiz ma’qul. 

2-qadam: Tozalash qiyin bo‘lgan joylardan kirlarni ketkazing
Klaviatura tugmachalari ostiga kirlar osongina yig‘ilib oladi. Ular vaqtida tozalanmasa, tugmalar noxush ovoz chiqara boshlaydi. Shuning uchun tugmachalarning nafaqat ustini, balki ostini ham tozalashga jiddiy e’tibor berish kerak. Bu vaziyatda rezina tozalagichlar (yoki Parite 24029 kabi pnevmatik tozalagich)dan foydalanish maqsadga muvofiq bo‘ladi. 
Hozirda do‘konlarda noutbuk, kompyuter va telefondagi tozalash qiyin bo‘lgan joylarni tozalaydigan yangi gelli tozalagichlar sotilyapti. 

3-qadam: Dezinfeksiyalash vositasidan foydalaning
Maxsus do‘konlarda gelli yoki spreyli dizenfeksiyalash vozitalari sotiladi. Ularni yumshoq matoga surib tugmachalar usti, oralarini ehtiyotkorlik bilan artib olish kerak. Faqat bu ishda tarkibida oqartiruvchi vositalari bor bo‘lgan salfetkalardan foydalanmang.

4-qadam: Elektron ulanishdan oldin, yuzalar to‘liq quruqligiga ishonch hosil qiling.
Kam miqdordagi namlikka ham jiddiy muammolarga olib kelishi mumkin. Klaviatura va sichqonchani quritgan bo‘lsangiz ham, yana bir necha daqiqa kutib turing va shundan keyingina ularni kompyuterga ulashingiz yoki batareykalarini joyiga qo‘yishingiz mumkin. 
Barchasini bajarganingizdan so‘ng klaviaturangiz tez ifloslanishini istamasangiz har safar kompyuteringiz qarshisiga qo‘lingizni yuvib, keyin o‘tirishingizni maslahat beramiz.