Qirg‘izistonda shov-shuvga sabab bo‘lgan “75 lar xati” ishi bo‘yicha hukm e’lon qilindi. Bishkekning Birinchi may tuman sudi sobiq Milliy xavfsizlik davlat qo‘mitasi (MXDQ) rahbari Qamchibek Tashiyevni to‘rt yil muddatga ozodlikdan mahrum qilishga hukm qildi. Sud qaroriga ko‘ra, ish bo‘yicha yana bir qator sobiq yuqori lavozimli amaldorlar va siyosatchilar ham “hokimiyatni zo‘rlik bilan egallash” moddasi bilan aybdor deb topildi. Ularning mol-mulki musodara qilindi va har biriga to‘rt yillik qamoq jazosi tayinlandi.

Biroq sud mahkumlarga uch yil muddatga probatsiya nazoratini qo‘lladi. Shu sababli ular jazoni koloniyada o‘tamasdan, nazorat ostida o‘tash imkoniyatiga ega bo‘ladi. Fevral oyidan buyon qamoqda saqlanayotgan besh nafar ayblanuvchi sud zalidan ozod etildi. Sud, shuningdek, ish figurantlarini mansab vakolatini suiiste’mol qilish moddasi bo‘yicha oqladi. Himoya tomoni hukmdan norozi ekanini bildirib, qaror ustidan yuqori instansiyaga shikoyat qilishini ma’lum qildi.

Ayblanuvchilarning hech biri o‘ziga qo‘yilgan ayblovni tan olmadi. Mazkur jinoyat ishi joriy yil fevral oyida internetda prezident Sadir Japarov va o‘sha paytdagi parlament spikeri nomiga muddatidan oldin prezidentlik saylovlarini o‘tkazishni so‘rab yozilgan, 75 nafar jamoat va siyosat arbobi imzolagan murojaat e’lon qilingach boshlangan. Oradan ko‘p o‘tmay Tashiyev lavozimidan ozod etilgan, aprel oyida esa unga va yana bir qator siyosatchilarga nisbatan jinoyat ishi qo‘zg‘atilgan edi.