Yangi qonun kuchga kirdi Mamlakatda tazyiq va zo‘ravonlikdan jabr ko‘rgan ayollar hamda ularning farzandlarini himoya qilish tizimini takomillashtirishga qaratilgan qonun rasman kuchga kirdi. Mazkur hujjat bilan qonunchilikka ilk bor “bolaning eng ustuvor manfaatlari” tushunchasi kiritildi va ularni ta’minlash kafolatlari qat’iy belgilab qo‘yildi.

Yangi qoidalarga ko‘ra, har bir bolaning oilada o‘sishi, ta’lim olishi, shuningdek, uning sha’ni, qadr-qimmati va shaxsiy daxlsizligi davlat tomonidan kafolatlanadi. Eng muhimi, bundan buyon bolaga taalluqli har qanday masalada qaror qabul qilinayotganda (masalan, ota-ona ajrashayotganda yoki boshqa nizoli vaziyatlarda) bolaning shaxsiy fikri majburiy tartibda hisobga olinadigan bo‘ldi.

Yana bir katta o‘zgarish – Ijtimoiy himoya milliy agentligi tizimidagi muassasalarga yangi va kuchli vakolat berildi. Endilikda ular zo‘ravonlikdan jabrlangan xotin-qizlar va bolalar manfaatlarini himoya qilib, davlat boji to‘lamagan holda to‘g‘ridan-to‘g‘ri sudga murojaat qilishlari hamda sud majlislarida ularning rasmiy vakili sifatida qatnashishlari mumkin. Bu esa himoyaga muhtoj shaxslarning huquqiy yordam olishini sezilarli darajada osonlashtiradi