Жорий йилнинг 4–7 август кунлари от спортининг конкур йўналиши бўйича «Maxima Master Eurasia» турнирининг 4-босқичи бўлиб ўтади. Унга Москва вилоятининг «Ҳорсека»(собиқ «Ивановская») от спорти мажмуаси мезбонлик қилади.

Халқаро турнирда Ўзбекистон шарафини Бекзод Қурбонов, Баҳромжон Газиев, Нуржан Туякбоев, Умид Комилов, Аъзам Толлибоев, Хуршидбек Алимжонов каби маҳоратли чавандозларимиз ҳимоя қилишади.

Бундан ташқари, ёшлар ўртасида ҳам мусобақалар ташкил этилиши режалаштирилган бўлиб, ушбу йўналишда Бобуржон Валижонов ҳамда Дилшод Шакировлар ғолиблик учун баҳс олиб боришади.

Мусобақа дастурига кўра, бугун 140 см баландликдаги гран-при ўтказилган. Эртага 150 см баландликдаги «Maxima Master Eurasia» гран-при кубоги, шунингдек, якшанба куни 150 см баландликдаги «Maxima Masters Eurasia Team Competition» йўналишлари бўйича икки босқичда баҳслар бўлиб ўтади.

Қайд этиш мумкин, Турнирнинг жамоавий баҳслари Миллатлар лигасига ўхшаш тарзда ташкил этилган бўлиб, аввалги босқичлар апрель ойида Тошкент шаҳрида, май ойида эса Бишкек шаҳрида ўтказилган ва уларнинг ҳар иккисида ҳам Ўзбекистон вакиллари ғолибликни қўлга киритишган.

Маълумот учун, кейинги босқич октябр ойида Москва яқинидаги «Maxima Park» от спорти мажмуасида бўлиб ўтади.

• От спорти
• Ўзбекистон