Тошкент вилоятининг Зангиота туманида ўтказилган тезкор тадбир давомида 10 килограммдан ортиқ кумушни ноқонуний сотишга уринган шахс ушланди. Маълум қилинишича, Тошкент шаҳрида яшовчи, 1992 йилда туғилган фуқаро 13 та қуйма кўринишидаги жами 10 кг 35 грамм кумушни махсус харидорга 20,8 минг АҚШ долларига сотаётган вақтда ашёвий далиллар билан қўлга олинган.

Мутахассислар хулосасига кўра, мусодара қилинган кумушнинг умумий қиймати 235 миллион 229 минг сўмни ташкил этади.Терговга қадар текширувларда гумонланувчи заргарлик буюмлари ишлаб чиқариш билан шуғулланувчи МЧЖ ходими экани аниқланган.  Корхонада олтин ва кумуш маҳсулотлари қайта ишлангани, бироқ қимматбаҳо металларни юқори даражада тозалаш ва ажратиб олиш (аффинаж) фаолиятини амалга ошириш учун тегишли рухсат мавжуд эмаслиги маълум бўлган. 

Шунингдек, текширув давомида ушбу манзилдан умумий қиймати 3 миллиард 483 миллион сўмлик 58 килограмм кумуш ҳамда 2,2 килограмм олтин борлиги аниқланган. Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари давом эттирилмоқда.