Ўзбекистон Республикаси Президенти томонидан 2025 йил 4–6 ноябрь кунлари АҚШга амалга оширилган ташриф давомида “C5+1” саммити доирасида Америка-Ўзбекистон ишбилармонлик ва инвестиция кенгашини ташкил этиш бўйича келишувга эришилди. Ушбу Кенгаш Ўзбекистон ва АҚШ ўртасидаги савдо, инвестиция ва иқтисодий ҳамкорликни янада кенгайтириш, ишбилармонлик муҳитини сифат жиҳатдан яхшилаш ва тадбиркорлик фаолиятини қўллаб-қувватлашни мақсад қилган.

Кенгашнинг асосий вазифалари қуйидагилар ҳисобланади:

1. Стратегик бизнес ташаббуслари, йирик инвестиция ва савдо лойиҳаларини ишлаб чиқиш, келишиш ва уларни амалга оширишни доимий мониторинг қилиш;

2. Ўзбекистонга қўшимча инвестицияларни жалб қилиш мақсадида махсус инвестиция фондини яратиш ва уни молиялаштириш, шунингдек, Халқаро молиявий тараққиёт корпорацияси (DFC) ҳамда бошқа йирик молия институтларини жалб қилиш;

3. Тариф ставкаларини ўзаро пасайтириш масалалари бўйича музокараларни давом эттириш;

4. ИТ-парк резидентлари маҳсулотлари ва хизматларини тарғиб қилиш; 

5. Ўзбекистоннинг инвестиция портфели, жумладан Марказий банк валюта захираларининг бир қисмини диверсификация қилиш бўйича таклифлар ишлаб чиқиш.

2026 йил 1 январдан Ўзбекистоннинг АҚШдаги элчихонасига маслаҳатчи-элчи лавозими жорий қилинади. Маслаҳатчи-элчи Кенгаш ишини мувофиқлаштириш, йирик ва стратегик инвестиция ҳамда савдо лойиҳаларини амалга ошириш, шунингдек, икки томонлама муносабатларни ривожлантиришга масъул бўлади. Лавозимга тайинлаш ва ундан озод қилиш ҳамда регламентни тасдиқлаш Ўзбекистон Республикаси Президенти Администрацияси раҳбарига юклатилган.

Ваколатли идораларнинг вазифалари:

Ташқи ишлар вазирлиги ва Инвестициялар, саноат ва савдо вазирлиги биргаликда Кенгаш фаолиятини қўллаб-қувватлайди ва ўзаро ҳамкорликни мувофиқлаштиради;

АҚШ ҳудудида янги консулликлар ташкил этиш ва уларни ўзбек диаспораси билан самарали алоқаларни йўлга қўйиш;

АҚШда резидентлар томонидан амалга ошириладиган инвестиция фаолиятини соддалаштириш, банк орқали маблағларни тўлиқ ва чекловларсиз ўтказиш имконини яратиш;

Кенгаш таркиби, регламенти ва фаолият тартибини белгилаш, Америка ишбилармонлик ва инвестиция ҳамжамияти вакилларини жалб этиш;

Ўзбекистон инвестиция портфели ва валюта захираларини юқори ликвидли ва фойдали активларга йўналтириш.

Мазкур Фармон ижроси Ўзбекистон Республикаси Президенти Администрацияси раҳбари зиммасига юклатилган бўлиб, барча вазирлик ва идораларга Кенгаш фаолияти бўйича белгиланган вазифаларни ўз муддатида амалга ошириш буюрилган.

Шу билан бирга, Америка-Ўзбекистон ишбилармонлик ва инвестиция кенгаши Ўзбекистоннинг хорижий инвестицияларни жалб қилишдаги стратегик платформаси сифатида фаолият олиб боради ва икки томонлама иқтисодий алоқаларни кенгайтириш, инвестиция лойиҳаларини амалга ошириш ҳамда ишбилармонлик муҳитини яхшилашда муҳим восита ҳисобланади.

• АҚШ
• Ҳамкорлик
• Ўзбекистон