Андижонда 200 млн сўмлик тақинчоқларни ички аъзоларига яшириб олиб кирмоқчи бўлган уч аёл қўлга тушди, деб хабар бермоқда вилоят божхона бошқармаси ахборот хизмати.

Қайд этилишича, Андижон аэропортида халқаро йўналишлар бўйича парвозлар йўлга қўйилиши билан бирга, божхона назорати жараёнида қонунбузарликларнинг олди олинмоқда. Хусусан, Истанбул–Андижон йўналиши билан учиб келган бир гуруҳ йўловчилар божхона ходимларида шубҳа уйғотган. Белгиланган тартибда ўтказилган шахсий кўрик давомида уч нафар аёл томонидан умумий оғирлиги 225,3 грамм бўлган тайёр заргарлик буюмларини ички аъзоларига яширган ҳолда олиб киришга урингани аниқланган.

Айни пайтда мазкур ҳолат юзасидан белгиланган тартибда процессуал ҳужжатлар расмийлаштирилди. Дастлабки баҳолашга кўра, ушлаб қолинган тақинчоқларнинг қиймати 200 миллион сўмни ташкил этади. Тақинчоқлар вақтинча сақловга олинган.

Ўзбекистонда ўн ойда яширин иқтисодиётга қарши курашиш доирасида 34,6 мингта ҳолатда қарийб 1 трлн сўмлик товарлар, жумладан 73,3 млрд сўмлик валюта қимматликлари, 114,1 млрд сўмлик заргарлик буюмларининг ноқонуний айланмасига чек қўйилди.

• Андижон
• Аёллар
• Божхона
• tekshiruv