АҚШнинг иммиграция ва божхона хизмати (ICE) ходими Миннеаполисда ўтказилган рейд вақтида 37 ёшли АҚШ фуқароси бўлган аёлни отиб ўлдирган.

Қўшма Штатлар Ички хавфсизлик вазири аёл ICE агентларини машина билан босиб кетишга уринганини, шу сабабли ходимлардан бири уни “ўзини ҳимоя қилиш мақсадида” отганини билдирди. Президент Доналд Трамп ҳам ушбу баёнотни қўллаб-қувватлаганди.

Миннеаполис мери Жейкоб Фрей Трамп маъмуриятининг агент ўзини ҳимоя қилиш учун ўқ узган деган баёнотини қатъиян рад этди. Фрей федерал иммиграция агентларини шаҳарда тартибсизлик чиқаришда айблаб, ICE'га қарата: “Миннеаполисдан йўқолинглар”, – деди. Шу билан бирга, у аҳолини хотиржамликка чақирди. Миннесота, Вашингтон ва бошқа штатлардаги демократ раҳбарлар ICE операциясини “кераксиз провокация ва фожиа билан якунланган ҳаракат” деб атамоқда.

Нью-Йорк мери Зоҳран Мамдани бундан кейин миграция хизмати агентларига текширувларда ёрдам бермаслигини билдирган.

АҚШ Ички хавфсизлик вазирлигининг маълум қилишича, Миннесотада 2 000 офицер жалб қилинган “тарихдаги энг йирик операция” ўтказилмоқда. Унда “фирибгарлар, қотиллар, зўравонлар ва жиноий тўдаларни” қўлга олиш мақсад қилинган.

• АҚШ
• norozilik