Аввалроқ, АОКА томонидан республикада фаолият юритаётган ОАВ учун Фарғона вилоятига медиа-тур ташкил этилганлиги ҳақида хабар берган эдик.

Мазкур медиа-турнинг иккинчи кунида ОАВ вакилларининг эътибори дастлаб, Бағдод туманида янги барпо этилган Гулистон шаҳарчасига қаратилди. 

Ўз навбатида, таъкидлаш жоиз, Президент ташаббуси билан бошланиб, «Бағдод тажрибаси» сифатида эътироф этилган ушбу шаҳарчада 61 та кўп қаватли турар-жой бинолари ҳамда маҳалла биноси, коворкинг маркази, маданият саройи, поликлиника, мактабгача таълим муассасаси, умумий ўрта таълим мактаби, спорт-соғломлаштириш ва кўплаб савдо мажмуалари қад ростлаган.

Боғдод тумани ҳокими Восилжон Назаровнинг таъкидлашича, марказдан 14 км узоқликда қурилган янги массив ҳисобига тумандаги 1 минг 200 дан ортиқ оила уй-жой билан таъминланган. Бундан ташқари, шаҳарча аҳолисининг бандлигини таъминлаш, улар учун реал даромад манбаларини яратиш мақсадида, ёндош ҳудудда ҳар бири 10 сотихдан иборат 1 мингта иссиқхона барпо этилмоқда. 

Бу иссиқхоналарнинг 400 тадан зиёдроғи эгаларига топширилган ва улар етиштирилган дастлабки ҳосилдан даромад олишни бошладилар. Шунингдек, «Мурувват» кичик саноат зонасида ўнлаб янги тадбиркорлик лойиҳалари иш бошлаши, натижасида 280 дан ортиқ иш ўринлари яратилди. 

Ташриф доирасида пресс-тур иштирокчилари янги хонадон эгалари билан суҳбатлашдилар; маданият марказида санъатнинг турли йўналишларида иқтидорга эга бўлган ёшларнинг ижодий жараёнлари билан бевосита танишдилар. Шунингдек, шаҳарчага мос тарзда янги қуриб битказилган замонавий мактаб ва боғчада яратилган шарт-шароитларни кўздан кечиришди. 

Бундан ташқари, ёшлар иссиқхона мажмуасида ёш деҳқонлар томонидан етиштирилаётган полиз маҳсулотларидан татиб кўриб, саноат зонасида ишлаб чиқарилаётган маҳсулотлар тури ва сифатига қизиқишди.  Пресс-тур иштирокчилари Қўқон шаҳрини четлаб ўтишмади. Республика ОАВ вакилларини қабул қилган галдаги манзил Қўқон эркин иқтисодий зонаси бўлди. 

Бу ерда экспорт ҳажми ва иш ўрни ортиб бораётган зона фаолиятида амалга оширилаётган ишлар борасида маълумотлар берилиб, бир неча ишлаб чиқариш заводларига хусусан, 275 нафардан ортиқ ишчи ўрни яратилган эркаклар кийимлари ишлаб чиқарувчи корхона ҳамда йилига 70 минг дона маҳсулот ишлаб чиқаришга мўлжалланган велосипед заводига кичик экскурсия ташкил этилди.

Умуман олганда 5 000 нафар ишчини тегишли иш ўринлари билан таъминлаб, йил охирига қадар бу рақамларни 6 000га етказишни мақсад қилган эркин иқтисодий зона 2021 йил охирига қадар ишлаб чиқариш ҳажмини 1 трлн 800 млрд сўм, экспорт ҳажмини эса минимум 55 млн АҚШ долларига етказишни мақсад қилган.

• Фарғона
• Медиа-тур