Бош вазир Абдулла Арипов жорий йил 20-21 июн кунлари Беларусда бўлиб ўтадиган Евроосиё ҳукуматлараро кенгаши йиғилишида иштирок этиш учун Минск шаҳрига етиб борди.

Аэропортда уни Беларусь бош вазири Роман Головченко кутиб олган. 

Беларус ва Ўзбекистон бош вазирлари “Юқори технологиялар парки”га ташриф буюриб, у ерда ишлаб чиқарилган маҳсулотлар билан танишди.

Мазкур паркнинг хизматлари экспорти 2021 йилда 4,6 миллион долларни, 2022 йилнинг 4 ойида эса 1,1 миллион долларни ташкил этди.

“Беларус IT-компанияларининг Ўзбекистондаги асосий қизиқиши банк сектори, соғлиқни сақлаш, атроф-муҳитни муҳофаза қилиш, саноат жараёнларини автоматлаштириш соҳасидаги рақамли лойиҳалардир”, – дейилади хабарда.

Тадбирда ЕОИИ давлатлари ва кузатувчи-давлатларнинг ҳукумат раҳбарлари, шунингдек, Евроосиё иқтисодий комиссияси  ҳайъати раиси иштирок этади.

Маълум қилинишича, кун тартибида электрон тижорат, божхона ҳамкорлиги масалалари ҳамда технологик саноат соҳаларида кооперация ва импорт ўрнини босиш бўйича комиссияни ташкил этиш каби масалалар ҳам муҳокама қилинади.

• Арипов
• Минск
• ЕОИИ