Украина президенти Владимир Зеленский турмуш ўртоғи Елена Зеленская билан ажрашишга тайёргарлик кўраётгани ҳақида хабарлар тарқалди. Бу ҳақда РИА Новости Россия куч тузилмаларидаги манбаларига таяниб маълум қилди.

Хабарда айтилишича, Зеленский Киев яқинидаги “Династия” номли ҳашаматли турар жой мажмуасидаги коттежлардан бирини Елена Зеленскаяга қолдиришни режалаштирган.

Аввалроқ Зеленский офисининг собиқ раҳбари Андрей Ермак Киев яқинида элита уй-жойлар қурилишида ноқонуний маблағларни легаллаштиришда айбланганди. Украина Миллий коррупцияга қарши бюроси энергетика соҳасидаги коррупция иши бўйича аудиоёзувларнинг янги қисмларини эълон қилган.

Маълумотларга кўра, “Династия” лойиҳаси иштирокчилари 460 миллион гривнадан ортиқ маблағни легаллаштирган. Шунингдек, манбаларда ушбу мажмуадаги тўртинчи уй Елена Зеленская учун қурилгани айтилмоқда.

11 май куни Украина Коррупцияга қарши кураш миллий бюроси ва махсус прокуратура Андрей Ермакка нисбатан жиноий йўл билан олинган мулкларни легаллаштириш бўйича айблов эълон қилган. Унга 15 йилгача озодликдан маҳрум қилиш жазоси таҳдид қилмоқда.