Тошкент шаҳрининг Сергели туманидаги Қумариқ маҳалласида 1,7 гектар майдонда фавворали сунъий кўл қурилиши бошланди. Лойиҳа доирасида кўл атрофидаги 5 гектар ҳудудда сайр ва спорт йўлакчалари, болалар майдончалари ҳамда дам олиш зоналари ташкил этилади. Бу ҳақда Тошкент шаҳар ҳокимлиги матбуот хизмати хабар берди.

Ҳокимлик маълумотига кўра, лойиҳа пойтахтнинг барча туманларида 12 та сунъий сув ҳавзасини барпо этиш режасининг бир қисми ҳисобланади. Янги сув ҳавзаси чангни камайтириш, ҳавони намлантириш ва ҳудудда қулай микроиқлим яратишга хизмат қилиши кутилмоқда.

Кўл атрофида пиёдалар, югурувчилар ва велосипедчилар учун йўлаклар, болалар майдончалари, ўриндиқлар ҳамда барбекю зоналари қурилади. Ҳозирда иншоотни мустаҳкамлаш ва кўлни ўраб турувчи ҳимоя деворини барпо этиш ишлари олиб борилмоқда. Қурилиш ишларининг 30 фоиздан ортиғи бажарилган, лойиҳани йил охиригача якунлаш режалаштирилган.

Қурилиш ишлари раҳбари Ахтам Ҳамроевнинг маълум қилишича, ноябргача кўл атрофидаги қарийб 800 метр узунликдаги деворни қуриб битказиш ва бўлажак сув ҳавзаси ўзанидан тупроқни олиб чиқиш режалаштирилган.

Ҳудудда табиий сув оқимлари ва каналлар бўлмагани сабабли кўл ерости қудуқларидан олинадиган сув билан тўлдирилади. Лойиҳа муаллифи Муҳиддин Холиқовнинг айтишича, сув 30 метр чуқурликдан тортиб олинади, автоматик датчиклар эса унинг сатҳини назорат қилади. Шунингдек, қуёш панеллари, сувни филтрлаш ва озонлаш тизимларини ўрнатиш кўзда тутилган.

Қайд этиш жоиз, яқинда Учтепа туманида ҳам 0,8 гектар майдонда сунъий кўл қурилиши ҳақида хабар берилган эди. Мазкур лойиҳа ҳудудида тўртта дарахт кесилгани аниқланиб, табиатга етказилган зарар 27,28 миллион сўмга баҳоланган.