Фарғона ва Наманган вилоятларида наркотик моддаларнинг ноқонуний айланмасига чек қўйилди. Бу ҳақда Давлат хавфсизлик хизмати хабар берди.

ДХХнинг Фарғона вилояти бўйича бошқармаси ходимлари божхона ва ички ишлар органлари билан ҳамкорликда Фарғона тумани “Лоғон” МФЙдаги хонадонлардан бирини белгиланган тартибда кўздан кечирди. Натижада ушбу манзилда 2000 йилда туғилган фуқарога тегишли 993 грамм гашиш ва 212 грамм “Алфа-PVP” наркотик моддаси, шунингдек, 2728 дона “Регапен” ҳамда 458 дона “Тропикамид” кучли таъсир қилувчи дори воситалари борлиги аниқланиб, ашёвий далил сифатида расмийлаштириб олинди.

Наманган вилоятида ўтказилган тезкор тадбир давомида эса Тошкент—Наманган йўналишида ҳаракатланаётган Spark автомобили Чуст тумани ҳудудида тўхтатилиб текширилди. Автомобилда кетаётган Наманган шаҳрида яшовчи 1992 йилда туғилган шахс ҳамда Давлатобод туманида истиқомат қилувчи 1997 йилда туғилган фуқаронинг ёнидан 1 килограмм 127 грамм опий моддаси топилди.

Ҳар икки ҳолат юзасидан мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Фарғонада қиймати 3,2 миллиард сўмлик кучли таъсир қилувчи дори воситалари контрабандасига чек қўйилгани, Тошкент вилоятида 5 килограммдан ортиқ опий олиб кетаётган икки йигит ушлангани ҳамда Афғонистондан олиб келинган қарийб 600 килограмм наркотик модда Термизда тўхтатиб қолингани ҳақида хабар берилганди.