Фарғона вилоятида онлайн кредитлар орқали фуқаролар номига йирик миқдорда қарз расмийлаштириб, фирибгарлик йўли билан 1 миллиард сўмдан ортиқ маблағларни қўлга киритган шахсга нисбатан жиноят иши қўзғатилди. У Қува туманида 1997 йилда туғилган фуқаро экани аниқланиб, ҳуқуқ-тартибот органлари томонидан ушланган.

Тергов маълумотларига кўра, гумонланувчи 10 дан ортиқ фуқаролар номига онлайн кредит ва ипотека расмийлаштириб, пулларни ўз эҳтиёжларига ишлатган. Айрим ҳолатларда Face ID ва ишончли кўринишдаги “ёрдам” орқали фуқаролар ишончига кириб, уларнинг номидан катта миқдорда қарзлар олинган. Жиноят кодексининг 168-моддаси 3-қисми (фирибгарлик) билан квалификация қилинган. Ички ишлар органлари жабрланган фуқароларни мурожаат қилишга чақирди.

Шунингдек, Марказий банк қарорига кўра, 22 апрелдан бошлаб фирибгарлик йўли билан расмийлаштирилган онлайн кредитлар бўйича фоиз, жарима ва неустойкалар тўхтатилади ҳамда суд қарори асосида жабрланувчиларга маблағлар қайтарилиши белгиланган.

• Фирибгарлик
• Кредит