Ўтган ҳафта Франция ҳукумати санкцияга учраган россиялик миллиардер Алишер Усмоновга тегишли иккита вертолётни Лазурн қирғоғида музлатиб қўйган эди. Франция Иқтисодиёт ва Молия вазирлиги вакили Forbes нашрига 22 март куни Ле-Кастель ва Монте-Карло шаҳрида иккита вертолёт “Airbus EC-175” ва “Eurocopter EC-155” музлатилганини тасдиқлади.

68 ёшли Усмонов Россиядаги энг бой одамлардан бири. У “Facebook”нинг биринчи инвесторларидан бири бўлган. Унинг энг йирик холдинги металл гиганти “Metalloinvest”даги акциялари бўлиб, у Хитойнинг “Xiaomi” маиший электроника компаниясининг улушларига, шунингдек, телекоммуникация, тоғ-кон саноати ва оммавий ахборот воситаларидаги кичикроқ холдингларга эга.

Қайд этилишича, M-DLBR белгиси бўлган вертолёт – “Airbus EC-175” охирги марта 2021 йил 13 ноябрда Ле-Кастелда рўйхатга олинган ва M-DLBA белгиси бўлган “Eurocopter EC-155” эса охирги марта Монте-Карлода 1 март куни кўрилган. Иккала вертолёт ҳам Британиянинг Ман оролида рўйхатга олинган, бироқ 3 март куни рўйхатдан чиқарилган. Ман оролининг самолётлар реестрига кўра, M-DLBR “Crystall Sky Limited”компаниясига, M-DLBA эса “Margaux Aviaton Limited” компаниясига тегишли. Ҳар икки корхона Кайман оролларида жойлашган. “Forbes” икки вертолётнинг нархини янги ва фойдаланилган модел нархларига асосланиб, 26 миллион долларга баҳолаган.

Усмонов матбуот котибининг “Forbes”га айтишича, “Арсенал” футбол клуби собиқ хўжайини вертолётларга эга эмас. Мулкнинг катта қисми, шу жумладан иккита вертолёт қайтариб олинмайдиган ва ишонч асосида бошқаришга берилган. 

“Усмонов уларга эгалик қилмайди. Мулкни оилавий ишончларга ўтказиш жараёни кўп йиллар олдин бошланган ва санкциялардан қочиш ёки бойликни яшириш билан ҳеч қандай алоқаси йўқ эди”, – деди матбуот котиби.

• Airbus
• Алишер Усмонов
• Fransiya
• Samolyot