Бирлашган Миллатлар Ташкилоти Ғазо секторида болалар ўртасида тўйиб овқатланмаслик даражаси хавфли босқичга етганидан огоҳлантирди. Маълумотларга кўра, 2025 йил давомида қарийб 95 минг бола ушбу муаммо билан юзма-юз келган. Қаттиқ қиш шароити гуманитар ёрдам туфайли эришилган қисқа муддатли ижобий натижаларни деярли йўққа чиқармоқда.

БМТ матбуот котиби Стефан Дюжаррик 12 январь куни бўлиб ўтган матбуот анжуманида Гуманитар масалаларни мувофиқлаштириш бошқармаси (ОЧА) маълумотларига таяниб, Ғазодаги гуманитар вазият ҳануз оғирлигича қолаётганини таъкидлади. Унинг сўзларига кўра, ноқулай об-ҳаво шароити гуманитар ёрдам етказиб бериш жараёнини жиддий мураккаблаштирмоқда.

“Фақат декабрь ойининг ўзида 76 мингдан ортиқ бола тиббий кўрикдан ўтказилди ва 4 900 та ўткир тўйиб овқатланмаслик ҳолати аниқланган. Шулардан 820 таси оғир даражадаги тўйиб овқатланмаслик ҳолатларидир. Натижада, 2025 йилда қайд этилган бундай ҳолатларнинг умумий сони қарийб 95 мингга етди”, — деди Дюжаррик.

БМТ вакилининг маълум қилишича, ҳозирга қадар 28 мингга яқин оилага чодирлар, брезентлар ва адёллар етказиб берилган. Шунга қарамай, Ғазо секторида 1,1 миллион киши ҳануз зудлик билан гуманитар ёрдамга муҳтож. Кучли ёмғирлар эса мавжуд вақтинчалик бошпаналарга жиддий зарар етказишда давом этмоқда.

• БМТ
• Болалар
• G‘azo
• Ochlik
• oziq-ovqat