Ҳиндистонда Нипаҳ вируси тарқалмоқда. Бу ҳақида The Independent хабар берди. Маълум қилинишича, юздан ортиқ киши карантинга олинган.

Ҳукумат Ғарбий Бенгалия штатида тарқалаётган вируснинг олдини олиш учун махсус гуруҳ тузди. Ҳозиргача 5 кишида вирус аниқланган, улар орасида шифокор ва ҳамширалар ҳам бор.

Беморлар Калкутта шаҳри шифохоналарида даволанмоқда. Бир нафарининг аҳволи оғир. Нипаҳ вируси кўршапалаклар орқали тарқаладиган патоген ҳисобланади. У ҳайвонлардан одамга ёки зарарланган озиқ-овқат орқали юқади.

Вирус касалликнинг оғир шаклларини ва нафас йўллари инфекцияларини келтириб чиқаради. Симптомларга юқори ҳарорат, бош ва мушак оғриғи, чарчоқ киради. Шунингдек, Нипаҳ йўтал, нафас қисилиши ва пневмония билан бирга келиши мумкин. Вирусга қарши вакцина ва даволаш йўқ. Касалланганларнинг 80 фоизи вафот этиши мумкин. Бу кўрсаткич коронавирусга қараганда ўнлаб марта юқори.

Россиялик шифокор Андрей Осипов сўзларига кўра, “Нипаҳ қисман ёки тўлиқ фалажлик кўринишидаги асоратни келтириб чиқариши мумкин. Организмнинг барча аъзо ва тизимларида етишмовчилик юзага келади. Кўпинча ҳаммаси ўлим билан тугайди”.

​АҚШ Касалликларни назорат қилиш ва олдини олиш маркази (CДC) маълумотига кўра, касалликнинг инкубация даври одатда 4 кундан 21 кунгача давом этади. Бироқ аввалги эпидемиялар пайтида камдан-кам ҳолларда касаллик аломатлари анча кечроқ пайдо бўлган ҳолатлар ҳам қайд этилган. Вирус биринчи марта 1999 йилда Малайзияда аниқланган бўлиб, ўшанда 300 га яқин одам касалликни юқтирган, улардан 100 дан ортиғи эса вафот этганди.

• Ҳиндистон
• Вирус