Бугун, 13 июнь соат 9:50 да Андижон шаҳар “Янги бозор” савдо мажмуасида ўзини “Илёс” деб таништирган ИИБ ходими томонидан шакар савдосини суратга олаётган Human.uz ходими Ж.Абдуллаевнинг хизмат телефони “видеога олиш қонунга зид” деган иддао билан куч ишлатиш йўли билан тортиб олингани айтилди. 

Хабарда айтилишича, журналистнинг уринишлардан сўнг ҳам смартфон қайтариб берилмаган. Ходим унга ўзининг куч ишлатгани ва телефонни тортиб олгани акс этган тасвирларни ўчириб юбориш  шарти билан телефонни қайтаришини айтган.

Мазкур ҳолат юзасидан ИИВ матбуот котиб Ш.Ғиёсов муносабат билдирди. Унинг таъкидича, журналист одамларнинг шакарга навбатини ва ўзаро гап талашаётганликларини тасвирга олишга уринган ва бу вақтда, фуқаролар томонидан уларнинг юзларини тасвирга олишига эътироз билдирилиб, ҳуқуқларини поймол қилмасдан тасвирни ўчириб ташлаш талаб қилинган.

Жамоат тартибини бузилишини олдини олиш мақсадида, бозор ҳудудига бириктирилган ИИО ходими томонидан журналистга фуқароларни розилигисиз уларни тасвирга олмаслик тушунтирилган.

Ҳозирда, шакарга навбатда турган фуқаролар ва Ж.Абдуллаев ўртасидаги зиддиятга ойдинлик киритиш мақсадида воқеа иштирокчилари ИИБга олиб борилган. 

Қонунчилик палатаси депутати Расул Кушербаев эса журналист воқеа ҳодисаларни тасвирга олишда умумий фондаги фуқароларнинг ҳар бирини юзини тасвирга тушишига улардан рухсат олиши қонунда йўқлигини таъкидламоқда.

“Кимки истамаса, камерадан юзини буриши мумкин. Ёки видео тарқатилишидан олдин журналистдан ўзининг юзини кўрсатмасликни сўраши мумкин. Ахборот тўплаб, тарқатиш журналистнинг профессионал фаолияти ҳисобланади. Фуқаронинг сўрови қониқтирилмаган тақдирда фуқаро бу бўйича фуқаролик судига мурожаат қилишга ҳақли.

Ички ишлар вазирлиги вакилининг ииб ходимларининг журналистдан мажбуран тасвирга олиш ускунасини тортиб олган ҳолатини бу тарзда хаспўшлаши абсурд ва мантиқсиз”, – деб ёзади депутат.

Кушербаев, шунингдек, вазиятга бундай услуб билан ёндашиш ички ишлар тизими обрўсини оширмаслигини, аксинча, тўкишини айтиб, ҳолатга вазирнинг шахсан ўзининг эътибор қаратиши зарурлигини таъкидлайди.

• Андижон
• ИИВ
• Кушербаев
• Муносабат