Бугун Ўзбекистон касаба уюшмалари Федерацияси саройида Жаҳон иқтисодиёти ва дипломатия университети битирувчиларига диплом топшириш тантанали маросими бўлиб ўтди. Тадбир битирувчилар, профессор-ўқитувчилар, давлат идоралари вакиллари ҳамда дипломатик корпус аъзоларини бир жойга жамлади.

Тантанали анжуман аввалида Олий Мажлис Сенати Раисининг биринчи ўринбосари, Жаҳон иқтисодиёти ва дипломатия университети ректори Содиқ Сафоев битирувчиларни онлайн тарзда қутлади ва келгусида Ўзбекистон тараққиётига муносиб ҳисса қўшишларига умид билдирди. У, шунингдек, талабаларни бутун ўқиш мобайнида қўллаб-қувватлаган ота-оналарга ҳам миннатдорлик изҳор этди.

Ўзбекистон ташқи ишлар вазирининг биринчи ўринбосари Баҳром Аълоев бўлажак дипломатлар олдидаги нутқида, улар доимий равишда ўз устида ишлаши, билими, тажрибаси ва малакасини оширишга интилиши, ишнинг инновацион услубларини жорий этиши кераклигини алоҳида урғулади.

Шундан сўнг университетдаги ёрқин ҳаёт ва талабаларнинг ютуқларига бағишланган видеоролик намойиш этилди.

Университет битирувчиларига Ўзбекистоннинг хориждаги дипломатик ваколатхоналари раҳбарлари, шунингдек, хорижий давлатларнинг юртимиздаги элчилари ўз табрикларини билдирдилар. Улар орасида Франция элчиси Орелия Бушез, Чехия элчиси Любомир Фреборт ҳамда БМТ ва бошқа хорижий ташкилотлар ваколатхоналари вакиллари бор эди.

Юқори ўзлаштириш ва фаол жамоатчилик фаолияти билан ажралиб турган 50 нафар битирувчига алоҳида эътибор қаратилди. Қолган битирувчиларга Ташқи ишлар вазирлиги ва муассаса раҳбарияти томонидан диплом ва сертификатлар топширилди.

Тадбир юртимизнинг таниқли санъат усталари ва талабалари иштирокидаги байрамона концерт билан якунланди.

• Диплом
• Иқтисодиёт
• Jahon iqtisodiyoti va diplomatiya universiteti
• rektor