Сурхондарё вилояти Қумқўрғон туманида сув тақчиллиги юқори бўлишига қарамасдан, туризм соҳасини ривожлантириш мақсадида янги лойиҳа амалга оширилмоқда. “ЎзА” хабарига кўра, “Жанубий Сурхон” сув омбори ҳудудида экотуризм мажмуаси қурилиши учун 15,7 гектар ер ажратилган.

Лойиҳа қиймати 140 млрд сўмга тенг бўлиб, унда табиий муҳитни муҳофаза қилиш масаласига катта эътибор қаратилмоқда. Мутасаддиларнинг маълумотича, қурилиш жараёнида атроф-муҳитни авайлаш, яшил майдонлар яратиш, экологик талабларга жавоб берувчи йўл ва инфратузилмалар барпо этиш, шунингдек, оқова сувларни тозалаш тизимини жорий этиш кўзда тутилган.

Янги масканда коттеж уйлар, бассейн, автотураргоҳ ва автомобиль ювиш шохобчалари қурилади. Шунингдек, савдо ва овқатланиш нуқталари, сув усти айвонлари, спорт ва болалар майдончалари ҳамда пиёдалар йўлаклари ташкил этилиши режалаштирилган. Лойиҳа доирасида балиқчилик фаолияти йўлга қўйилиши ҳам назарда тутилмоқда.

Маълумот учун, “Жанубий Сурхон” сув омбори 58 йил аввал ишга туширилган бўлиб, денгиз сатҳидан 408 метр баландликда жойлашган. Унинг тўла сув сиғими 800 миллион куб метрни ташкил этади.

• Сурхондарё
• Сув омбори
• Туризм