Фарғона вилоятининг Қўқон шаҳрида кучли таъсир қилувчи дори воситаларининг ноқонуний савдоси билан шуғулланган шахслар қўлга олинди. Бу ҳақда Ички ишлар вазирлиги маълум қилди. Қайд этилишича, “Хавфсиз ва соғлом юрт” тезкор-профилактик тадбирининг иккинчи босқичи доирасида ўтказилган тезкор амалиёт давомида 1997 йилда туғилган, аввал икки марта судланган аёл ва унинг 2006 йилда туғилган қариндоши яшаш хонадонидан сотиш мақсадида яширилган 400 дона “Тропикамид” ҳамда 14 дона “Регапен” дори воситалари аниқланди.

Тезкор тадбирлар давомида уларнинг яна бир шериги — 1993 йилда туғилган, илгари судланган шахс ҳам ушланди. У бошқарувидаги Gentra автомобилидан тарқатиш учун олиб кетилаётган 600 дона “Тропикамид” топилиб, ашёвий далил сифатида расмийлаштирилди. Суриштирувларда гумонланувчи ушбу дори воситаларини беш йил давомида чет давлатдан контрабанда йўли билан олиб кириб, ноқонуний тарқатиб келгани аниқланди.

Натижада жами 12 514 дозага тенг 1000 дона “Тропикамид” ва 14 дона “Регапен” дори воситаларининг ноқонуний муомалага чиқарилишининг олди олинди. Ҳолат юзасидан гумонланувчиларга нисбатан Жиноят кодексининг 276⁶-моддаси 3-қисми “в” банди билан жиноят иши қўзғатилиб, тергов ҳаракатлари олиб борилмоқда.