Самарқанд вилоятида 150 туп дарахт ноқонуний кесилгани бўйича чора кўрмаслик эвазига пора олган экология бўлими бошлиғи қўлга олинди. Бош прокуратура ҳузуридаги Департамент маълум қилишича, Жомбой тумани экология ва атроф-муҳитни муҳофаза қилиш бўлими бошлиғи Ж.Р. “Зарафшон” МФЙ ҳудудида кесилган 150 туп терак юзасидан тўпланган ҳужжатлар бўйича қонуний чора кўрмаслик, табиатга етказилган зарар миқдорини камайтириш ҳамда транспорт воситасини жарима майдончасидан чиқариб бериш эвазига фуқародан 11 миллион сўмлик компьютер жамланмасини олган вақтида ашёвий далиллар билан ушланган.

Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари олиб борилмоқда. Эслатиб ўтамиз, аввалроқ Фарғона вилоятининг Бувайда туманида ҳам экология тизими ходими 9,5 минг АҚШ доллари миқдорида пора олганликда гумонланиб қўлга олингани ҳақида хабар берилганди.