Ўзбекистон Республикаси Ички ишлар вазири Пўлат Бобожонов Малдив Республикаси Ички ишлар вазири Шайх Имрон Абдулла бошчилигидаги делегацияни қабул қилди.

Қайд этилишича, мазкур ташриф доирасида икки давлат Ички ишлар вазирлиги ўртасида ўзаро ҳамкорлик ўрнатиш ва тажриба алмашиш асосий мақсад этиб белгиланган.

Учрашувда Малдив томони ички ишлар органлари тизимида амалга оширилаётган ислоҳотларни алоҳида таъкидлаб, жиноятчиликка қарши кураш ва жамоат хавфсизлигини таъминлаш соҳасида Ўзбекистон тажрибасини ўрганиш истагини билдирган.

Меҳмонлар бугунги кунда мамлакатимизда жиноят содир этган шахслар билан ишлаш тизими, хусусан уларни ижтимоий ҳаётга мослаштириш, уларга психологик кўмаклашиш ва иш билан таъминлаш масаласида амалга оширилаётган идоралараро ҳамкорлик жараёнини алоҳида эътироф этдилар.

“Томонлар ўртасидаги учрашув самимий ва дўстона руҳда ўтди” – дейилади хабарда.

Малдив Республикаси Ички ишлар вазирлиги делегациясининг Ўзбекистонга расмий ташрифи давом этмоқда.

• ИИВ
• Maldiv
• Ўзбекистон