ЖССТ маймун чечагига қарши иккинчи вакцинани тасдиқлади. Уни болаларда ҳам қўллаш мумкин. Бу ҳақда Соғлиқни сақлаш вазирлиги матбуот хизмати хабар бермоқда.

Япониянинг “КМ Biologics” компанияси томонидан ишлаб чиқилган ушбу эмлаш воситаси “ЛC16м8” деб номланади.

Қайд этилишича, шу йил сентябрь ойида фойдаланиш учун рухсат этилган Даниянинг “Бавариан Nordic A/S” компаниясига тегишли “МВА-БН” номли илк эмлаш препарати 18 ёшдан ошганларда қўллашга мўлжалланган эди.

Японияда ишлаб чиқарилган янги вакцинани эса нафақат катталар, балки бир ёшдан ошган болалар ҳам фавқулодда ҳолатларда қабул қилиши мумкин.

ЖССТ баёнотида айтилишича, Япония ҳукумати маймун чечаги эпидемияси авж олган Конго Демократик Республикасига ушбу вакцинадан 3 миллион дозасини беғараз ёрдам сифатида етказиб беришга қарор қилган.

Сентябрь ойида дунё бўйича мпох инфекциясига чалиниш ҳолатлари рекорд даражага етиб, 2 763 та янги касалланиш ҳолати рўйхатга олинган эди. Аниқланган беморларнинг асосий қисми эса Африка минтақаси аҳолиси ҳиссасига тўғри келган.

• Вакцина