Анқарада ўтаётган НАТО саммити доирасидаги расмий кечки қабул нафақат дипломатик учрашувлар, балки биринчи хонимлар ва аёл етакчиларнинг нафис либослари билан ҳам эътибор марказида бўлди. Бу ҳақда Habertürk хабар берди. Меҳмонларни Туркия президенти Ражаб Тоййиб Эрдўғаннинг рафиқаси Эмине Эрдўған тўқ кўк рангдаги, миллий услуб элементлари акс этган либосда кутиб олди. У ушбу либосни аввал ҳам, 2017 йил 29-октабр куни Туркия Республикаси ташкил топган кун муносабати билан Президентлик мажмуасида ўтказилган расмий маросимда кийган эди. Франция президенти Эммануэл Макрон билан ташриф буюрган Брижит Макрон эса тиззадан паст узунликдаги қора классик либосни танлади. У образини кичик қора сумка билан тўлдириб, содда ва нафис француз услубини намойиш этди.

Руминия президенти Никушор Дан билан келган Мирабела Градинару елка қисмидаги ёпинчиғсимон деталларга эга мовий узун либоси билан эътиборни тортди. Табиий турмакланган соч турмаги унинг образига енгиллик бахш этди. Чехия бош вазири Андрей Бабишни кузатиб келган Моника Бабишова эса оқ рангдаги узун либосни танлади. Либоснинг енг қисмидаги ҳажмли безаклар, бриллиант зираклар ва оқ сумка унинг образини янада нафис кўрсатди. Қайд этилишича, НАТО саммитининг илк кунидаги расмий қабул нафақат халқаро хавфсизлик ва геосиёсий масалалар муҳокама қилинган дипломатик тадбир, балки биринчи хонимлар ва аёл етакчиларнинг услуби намойиш этилган ёрқин оқшом сифатида ҳам йодда қолди.