Тошкент вилояти Олмалиқ шаҳрида жойлашган умумтаълим мактабларидан бирида 10-синфда таҳсил олган ўқувчи қиз вафот этди.

Nemolchi.uz хабарига кўра, ўқувчининг ўлимига кучли стресс сабаб бўлган.

“Мактабда юқори синф ўқувчиси бўлган бир қиз ҳақида нохуш миш-мишлар тарқалган эди. Бу қиз ота-оналар қўмитаси вакилининг ё қариндоши, ё таниши бўлган. У ёлғон баҳона билан ички ишлар ходимларини чақиртириб, қизларга қўпол оҳангда, баланд овозда “маъруза” ўқий бошлаган. Сўнгра миш-миш тарқатишда “гумон қилинган” қизларни суҳбат учун алоҳида хонага чақиришган. Менинг фарзандим ҳам шу йиғилишда эди. Мен ва кўплаб ота-оналар ғазабдамиз. Қандай қилиб болаларни ота-оналар ва психологларни огоҳлантирмасдан йиғиш мумкин? Қайси ҳуқуқ билан бу ота-она ҳуқуқ-тартибот идоралари ходимлари (эркаклар) ҳузурида бизнинг болаларимизга баланд овозда дашном беради, устига-устак ноқулай саволлар беришга журъат этган ўқитувчини ишдан бўшатиш билан қўрқитишга ҳадди сиғади?”, — дейди марҳум қизнинг онаси.

Манбага кўра, суҳбат жараёнида масъул шахслар томонидан ўқувчиларга кескин ва баланд овозда мурожаат қилинган. Ўқувчи қиз ушбу ҳолатни оғир қабул қилиши оқибатида кучли руҳий босимга учраган.

Шунингдек, мазкур ҳодиса юзасидан Тошкент вилояти Мактабгача ва мактаб таълими бошқармаси расмий муносабат билдирди. Маълумотларга кўра, воқеа 2026 йил 28 январь куни Олмалиқ шаҳридаги 5-сонли умумтаълим мактабида юз берган. Мактабнинг 10-синф ўқувчиси (2009 йилда туғилган) К.Й. мактаб йўлагида ҳушини йўқотган. Дастлабки тиббий ёрдамларга қарамай вафот этган.

Бошқарма маълумотига кўра, айни пайтда ҳуқуқ-тартибот органлари томонидан ҳодиса юзасидан суриштирув ишлари олиб борилмоқда. Якуний хулосалар расмий текширувлар ниҳоясига етгач эълон қилинади.

• Мактаб
• Ўқувчи
• Toshkent viloyati