“Ўзбекистон дипломатлари саъй-ҳаракати билан Ўмонда оғир ҳаётий вазиятга тушиб қолган аёлнинг Ўзбекистонга қайтиши таъминланди”, – деб хабар қилмоқда “Дунё” АА. Ўзбекистон элчихонаси маълумотига кўра, Ўмонда оғир ҳаётий вазиятга тушиб қолган фуқаро И.С. мурожаат қилиб, икки нафар вояга етмаган фарзанди билан Ўзбекистонга қайтишида ёрдам сўраб мурожаат қилган.

Мурожаатда қайд этилишича, у 2019 йилдан буён Ўмоннинг ал-Бурейми шаҳрида, асли келиб чиқиши эронлик бўлган, лекин ҳеч бир давлат фуқаролигига эга бўлмаган, Али исмли шахс билан шаръий никоҳ асосида бирга яшаб келган. И.С. шаръий эридан 2020 йилда ва 2022 йилда фарзандларни дунёга келтирган. Оила бошлиғининг ҳеч қандай ҳужжатга эга эмаслиги ва қонуний никоҳ шартномасининг йўқлиги сабабли фарзандларга туғилганлик ҳақидаги гувоҳномаларни расмийлаштириш ҳам йиллар давомида ортга сурилиб келган.

Шунингдек, оиладаги келишмовчилик, ноқонуний эрнинг фарзандларга нисбатан тез-тез куч ишлатиш ҳолатлари ва уларни ал-Бурейми шаҳридаги хонадонда тутқунликда сақлаш ҳолатлари аёлнинг Ўзбекистон элчихонасига ёрдам сўраб ариза ёзишга ундаган.

Аризада қайд этилган ҳолатлар батафсил ўрганилганидан сўнг, жорий йил 19 май куни элчихона ходимлари ал-Бурейми шаҳридаги И.С. ушлаб турилган хонадонга ташриф буюради. Дипломатлар кўмагида она ва унинг икки нафар вояга етмаган болалар Масқат шаҳрига олиб келиниб, вақтинча яшаш учун жой билан таъминланган.

Шундан сўнг, элчихона консуллик бўлими томонидан Ўмон тегишли давлат идораларига мурожаатлар қилиниб, И.С.нинг вояга етмаган фарзандларига туғилганлик ҳақидаги ва ватанга қайтиш учун гувоҳномалар расмийлаштирилди. “Ватандошлар” жамоат фонди ва Ўзбекистон Миграция агентлиги ҳамда Масқатдаги фаол ўзбекистонликлар кўмагида мазкур оиланинг Ўзбекистонга қайтиши учун авиачипталар харид қилинган.

Мазкур оила жорий йил 18 июнь куни Масқат шаҳридаги халқаро аэропортдан Ўзбекистонга кузатиб қўйилган.

• Fuqarolik
• Konsullik
• Уммон