Ўзбекистонда фармацевтика соҳасини тубдан ўзгартирувчи ва аҳолимизни сифатли дори-дармонлар билан таъминлашга қаратилган муҳим Президент Фармони қабул қилинди. Хўш, бу ўзгаришлар оддий фуқаролар ҳаётида қандай акс этади?

Энг муҳим янгиликлар:

Оригинал дорилар арзонлашади: Хорижнинг оригинал дорилари патент муддати тугаши билан ўзимизда ишлаб чиқарилади. Бунинг учун тадбиркорларга давлат томонидан 100 минг долларгача субсидия ажратилади. Натижада, дорихоналаримизда сифатли ва ҳамёнбоп маҳаллий маҳсулотлар кўпаяди.

Дориларни йўқ қилиш ўрнига — муҳтожларга хайрия: Шу пайтгача тадбиркорлар яроқлилик муддати тугаб бораётган дориларни бепул тарқатишдан кўра, йўқ қилишни афзал кўрарди (чунки хайрия қилинса, солиқ тўланарди). Эндиликда яроқлилигига 6 ой қолган дориларни тиббиёт муассасаларига бепул берган тадбиркорлар солиқдан озод қилинади.

Мактабдан тўғридан-тўғри университетнинг 2-курсига: Абу Али ибн Сино номидаги мактаб ўқувчилари учун 5 йиллик махсус STEM дастури жорий этилади. Чет тили ва табиий фанларни аъло баҳоларга ёпган битирувчилар Фармацевтика техник университетининг 2-курсига имтиҳонсиз қабул қилинади.

Фармоннинг қабул қилиниши ички бозорни хавфсиз ва ҳамёнбоп дори воситалари билан таъминлаш орқали миллат асрашда муҳим қадам бўлади. Бундан ташқари, соҳада янги инновацияларни қўллаб-қувватлаш ва ёш иқтидорларни тайёрлаш тизими бутунлай янги босқичга олиб чиқилади.

• Dori
• Фармасевтика
• Фармон
• Президент