Жорий йил 1 сентябрга ўтар кечаси Афғонистоннинг шарқий ҳудудларида содир бўлган зилзила оқибатида кўплаб инсонлар ҳалок бўлди. Шу муносабат билан Ўзбекистон Республикаси Президенти Шавкат Мирзиёевнинг топшириғига мувофиқ, бағрикенглик ва ҳамдардлик рамзи сифатида Кунар ва Нангарҳор вилоятлари аҳолиси учун инсонпарварлик ёрдами юборилди. Бу ҳақда Сурхондарё вилояти ҳокимлиги хабар берди.

Маълум қилинишича, озиқ-овқат маҳсулотлари, дори-дармон ва тиббий буюмлар ортилган 300 тоннага яқин юк Ўзбекистон халқи номидан Балх вилоятига етказилган. Ҳайратон шаҳридаги “Астрас” компанияси ҳудудида инсонпарварлик ёрдамини топшириш маросими бўлиб ўтган. Тадбирда Ўзбекистон Республикаси Президентининг Афғонистон бўйича махсус вакили Исматилла Эргашев, Сурхондарё вилояти ҳокими Улуғбек Қосимов, Балх вилояти губернаторининг ўринбосари Нурулҳоди Абуидрис ҳамда икки томон расмийлари иштирок этган.

“Юборилган ёрдам таркибидан ун, гуруч, шакар, тушёнка, макарон ва қандолат маҳсулотлари, ёғ, тез тайёрланадиган таомлар, қизил ловия ва мош, қадоқланган ичимлик суви, 5 мингта ёпинғич ҳамда 10 тоннадан ортиқ дори воситалари ва тиббий буюмлар ўрин олган”, – дейилади хабарда.

Афғонистон расмийлари Ўзбекистон Президенти ва халқига кўрсатилаётган бундай инсонпарварлик ёрдами учун чуқур миннатдорлик билдирган.

Сўнгги маълумотларга кўра, зилзила қурбонлари сони 2205 кишига, жароҳатланганлар сони эса 3640 нафарга етган. Зилзиладан энг кўп жабр кўрган Нур-Гул, Савки, Чапа-Дара ва Маноги туманларида қутқарув ишлари давом этмоқда.

• Афғонистон
• Гуманитар ёрдам
• Ҳокимлик
• Ўзбекистон
• Сурхондарё