Ўзбекистон Республикаси Маданият вазирлиги томонидан миллий маданиятимизни хорижда тарғиб қилиш, унинг халқаро миқёсда танитилишига ҳисса қўшиш, шунингдек, Туркияда яшаётган ватандошларимиз ўртасида бирдамликни мустаҳкамлаш борасидаги фидокорона саъй-ҳаракатлар муносиб эътироф этилди.

Мазкур йўналишдаги ишларни янада жадаллаштириш мақсадида, Ўзбекистон маданият вазирлиги томонидан Туркияда фаолият юритувчи “маданият элчиси” лавозими жорий этилди.

Ушбу масъулиятли ва шарафли вазифага, миллий илдизларига садоқат билан хизмат қилиб келаётган, 60 ёшли асли ота-боболари Ўзбекистондан бўлган Чокай Кочар тайинланди.

Ёрлиқни Ўзбекистоннинг Туркиядаги фавқулодда ва мухтор элчиси Илҳом Ҳайдаров топширди.

Маълумот учун:

Чокай Кочар Туркиянинг Адана шаҳрида туғилган, миллати - ўзбек. Селчук ва Гелишим университетларини тамомлаган. Узоқ йиллар давомида “Туркистонликлар жамияти”да фаолият юритган. Сўнгги йилларда эса “Ўзбекистон маданияти, бирдамлик ва ҳамкорлик жамияти”ни ташкил этиб, Туркияда ўзбек миллий асраб-авайлаш, урф-одатларимизни ёш авлодга етказиш ва маданий алмашинувни ривожлантиришга катта ҳисса қўшиб келмоқда.

“Маданият элчимизга келгуси фаолиятларида улкан муваффақиятлар тилаймиз” – дейилади Ўзбекистон элчихонасининг расмий саҳифаси орқали.

• Элчи
• Маданият
• Санъат
• Туркия