Бугун, 2 ноябрь куни Ўзбекистон Ташқи ишлар вазири Бахтиёр Саидов Афғонистондаги “Толибон” муваққат ҳукумати ташқи ишлар вазири вазифасини бажарувчи Мавлавий Амир Хон Муттақий билан телефон мулоқот ўтказди.

Билдирилишича, суҳбат давомида мулоқот ва дипломатия мавжуд чақириқларга ечим топишда ҳамда ўзаро тушунишни мустаҳкамлашнинг энг самарали воситаси экани алоҳида таъкидланган.

“Суҳбатимиз чоғида мамлакатларимиз ўртасидаги икки томонлама кун тартиби ва минтақавий жараёнлар юзасидан фикр алмашдик. Ҳамкорлик алоқаларини мустаҳкамлаш ҳамда минтақада тинчлик ва барқарорликни таъминлашга оид ўзаро садоқатимизни яна бир бор тасдиқладик”, – деб ёзади Бахтиёр Саидов.

Мавлавий Амир Хон Муттақийнинг маълум қилишича, Афғонистон ҳукумати барча қўшни давлатлар билан ўзаро ҳурмат, аралашмаслик ва конструктив алоқалар асосида муносабатлар ўрнатишни хоҳлаётганини айтган. У, шунингдек, Ўзбекистон каби минтақадаги давлатлар билан ижобий муносабатларни ривожлантиришга алоҳида эътибор қаратган ва ҳар қандай аралашувдан кўра, тушуниш, иқтисодий ҳамкорлик ва ўзаро ишонч муҳитини мустаҳкамлаш зарурлигини таъкидлаган.

• Афғонистон
• Xitoy Tashqi ishlar vaziri
• muloqot