Жорий йилда куз фасли ёмғирсиз ўтаётгани, келгуси кунларда ҳам ёғингарчилик кутилмаётгани, ёмғир эса ризқ-у рўз, мўл-кўлчилик омили экани эътиборидан Ўзбекистон мусулмонлари идораси раиси, муфтий Шайх Нуриддин Холиқназар ташаббуси билан 2025 йил 28 ноябрь куни жума намозидан кейин Ўзбекистондаги барча масжидларда икки ракат истисқо намози ўқилади. Бу ҳақда Ўзбекистон мусулмонлари идораси матбуот хизмати хабар берди.

“Пайғамбаримиз соллаллоҳу алайҳи васаллам ёмғир ёғмай, сувсизлик бўлган даврларда жамоат билан қиблага юзланиб дуо қилганлари, кейин ўзлари имом бўлиб намоз ўқиганлари ривоят қилинган. Аллоҳ таолодан сув-ёмғир сўраладиган истисқо намози фазилати ҳадис китобларида баён қилинган”, – дейилади хабарда.

Шунингдек, вилоятлар, туман-шаҳарлар марказий масжидлари ва зиёратгоҳларда жонлиқлар сўйилиб, ёрдамга муҳтож оилалар, етим-есирлар, бева-бечоралар, мискинлар, боқувчисини йўқотган кексаларга тарқатилади.

Ўзбекистон мусулмонлари идораси тасарруфидаги Олий ва ўрта махсус ислом таълим муассасалари устоз ва талабалари томонидан Имом Бухорий “Саҳиҳи Бухорий” асари шу йил 28 ноябрь куни жума намозига қадар хатми кутуб қилинади.

Хабарга кўра, Макка ва Мадинада умра зиёратида бўлиб турган элликбоши имом-домлаларга ҳам ўз гуруҳлари иштирокида истисқо намозини ўқишлари тавсия этилган.

• Muftiy
• O‘zbekiston musulmonlari idorasi
• хабар