Ўзбекистонда муаллифлик ҳуқуқини бузаётган сайтларнинг реестри юритилади. “Интеллектуал мулк соҳасини янада ривожлантиришга оид қўшимча чора-тадбирлар тўғрисида”ги Президент қарори қабул қилинди.

Қарорга мувофиқ, Давлат божхона қўмитаси Интеллектуал мулк обектларининг божхона реестрига (Реестр) киритилган товар белгилари бўйича қонунчилик талаблари бузилиши ҳақида хабар беради.

Интеллектуал мулк ҳуқуқларини ҳимоя қилиш бўйича техник жиҳатдан тартибга солиш ва соҳадаги қонунчилик талабларига қатъий риоя этилиши Техник жиҳатдан тартибга солиш агентлиги ва Фармацевтика тармоғини ривожлантириш агентлиги томонидан амалга оширилади.

Таъкидланишича, 2022 йил 1 августдан қуйидаги текшириш ва ўрганишлар Адлия вазирлигининг “Саноат мулки муҳофазаси портали”дан фойдаланган ҳолда амалга оширилади:

• сертификациялаш органлари томонидан сертификатлаштириш жараёнидаги қўлланилган ном, қадоқлар ва бошқа реквизитларда интеллектуал мулк обектларига бўлган ҳуқуқларни ўрганиш ва текшириш;
• Фармацевтика тармоғини ривожлантириш агентлиги томонидан дорилар, тиббий буюмларни рўйхатидан ўтказишда интеллектуал мулк обектларига бўлган ҳуқуқларга риоя этилганлигини текшириш.
• Қарорга кўра, 2022 йил 1 июнгача сертификациялаш билан шуғулланувчи барча органлар “Саноат мулки муҳофазаси портали”га бепул уланиши мумкин. 

Қайд этилишича, 2022 йил 1 сентябрдан “Ягона дарча” божхона тизими орқали интеллектуал мулк обектларини Реестрга киритиш тўғрисидаги аризаларни электрон юбориш ва ариза ҳолатини онлайн кузатиб бориш ҳамда натижаси бўйича аризачиларни хабардор қилиш тартиби йўлга қўйилади.

Маълум қилинишича, 2023 йил 1 январгача интеллектуал мулк обектларининг ауцион савдосини ўтказадиган “Интеллектуал мулк – барча учун” махсус интернет-ауцион савдо платформаси ишлаб чиқилади.

Шунингдек, 2022 йил 1 октябргача Интернетда муаллифлик ҳуқуқи ва турдош ҳуқуқларни бузган веб-сайтлар тўғрисидаги маълумотларни ўз ичига олувчи “Муаллифлик ва турдош ҳуқуқлар соҳасидаги қонунбузилишлар реестри” ахборот тизими ишга туширилади.

Қарор билан 2022–2026 йилларда Ўзбекистон Республикасида интеллектуал мулк соҳасини ривожлантириш стратегияси тасдиқланди.

• Intellektual mulk agentligi
• Президент
• Қарор
• Шавкат Мирзиёев