Ўзбекистонда пиротехника буюмларининг ноқонуний савдосига қарши чоралар кучайтирилмоқда. Янги қонунга кўра, бундай ҳуқуқбузарликлар учун жарималар кескин оширилиб, энг кам жарима БҲМнинг 15 баравари – 6,18 млн сўм, энг юқориси эса БҲМнинг 25 баравари – 10,3 млн сўм этиб белгиланди. 

2025 йил 29 июлида Қонунчилик палатаси томонидан қабул қилинган, 1 ноябрда эса Сенат томонидан маъқулланган “Пиротехника буюмларининг муомаласи тўғрисида”ги Қонун кучга кирди. Ушбу қонундан кўзланган асосий мақсад пиротехника буюмлари муомаласи билан боғлиқ муносабатларни ҳуқуқий тартибга солиш ва фуқаролар хавфсизлигини таъминлашдир. 

Мазкур қонунга асосан, Маъмурий жавобгарлик тўғрисидаги кодекснинг 185-1-моддаси биринчи қисмига ўзгартириш киритилди. Унга кўра, санкциядаги “беш бараваридан йигирма бараваригача” деган сўзлар “ўн беш бараваридан йигирма беш бараваригача” деган сўзлар билан алмаштирилган. 

Энди МЖтКнинг 185-1-моддасига кўра, ушбу ҳуқуқбузарликни содир этган фуқаролар учун жарима миқдори БҲМнинг 15 баравари (6,18 млн сўм)дан 25 бараваригача (10,3 млн сўм)ни ташкил этади. Амалдаги таҳрирга кўра, жарима БҲМнинг 5 бараваридан 20 бараваригача. 

Қонунга кўра, пиротехника буюмлари – таркибидаги моддаларнинг ёниши (портлаши) ёрдамида оптик, акустик, электр ва бошқа визуал эффектлар ҳосил қилиш учун мўлжалланган қурилмалар ҳисобланади. Улар жумладан атроф-муҳитнинг шикастланиш даражасига қараб И-В хавфлилик синфларига бўлинади. 

Хавфлиликнинг I синфига кирувчи пиротехника воситалари, яъни бенгал маёқчалари, стол фонтанлари, хлопушка каби хавфли ҳудуд радиуси 0,5 метрдан ошмайдиган пиротехника буюмлари эркин муомалада бўлиши аниқ қайд этилган. Мазкур синфга кирувчи пиротехника буюмларини ишлаб чиқариш, уларни сақлаш, фойдаланиш ва бошқа турдаги ҳаракатлар учун ҳеч қандай тақиқ бўлмайди. II-В хавфлилик даражасига эга бўлган пиротехника буюмлари эса – тақиқланади.

Қонун расмий эълон қилинган кундан 3 ой ўтгач кучга киради.

• Jazirama
• Пиротехника
• Qoidabuzarlik
• Қонун