“Навоий” чегара божхона постида йўловчилардан бирининг юклари текширилганда сумкаси ичидан йўлбарссимон бўғма илон аниқланиб, уни мамлакат ҳудудига ноқонуний олиб киришга уриниш ҳолатига чек қўйилди.

Маълум қилинишича, ушбу илон тури халқаро муҳофаза остида бўлиб, уни Ўзбекистонга олиб кириш учун махсус CITES рухсатномаси талаб этилади. Бироқ йўловчи тегишли ҳужжатларни тақдим эта олмаган. Ҳозирда ҳолат юзасидан божхона органлари томонидан суриштирув ишлари олиб борилмоқда. 

Жонивор белгиланган тартибда Тошкент ҳайвонот боғига топширилган бўлиб, унинг ҳолати қониқарли экани маълум қилинган.Йўлбарссимон бўғма илон заҳарсиз бўлса-да, кучли мушаклари ёрдамида ўлжасини сиқиб овлайдиган йирик судралиб юрувчилар турига киради.