Вакилларимиз тарихда илк маротаба “Осиё олимпиадаси” номини олган нуфузли мусобақада қатнашиш ҳуқуқини қўлга киритдилар.

Шу кунларда Таиланд пойтахти Бангкок шаҳрида чим устида хоккей бўйича Ханчжоу-2022 ХIХ ёзги Осиё ўйинларига саралаш мусобақаси бўлиб ўтмоқда. Унда қитъамизнинг 9та давлати вакиллари ғолиблик учун баҳс олиб боришяпти.

Саралаш мусобақасида иштирок этаётган Ўзбекистон чим устида хоккей терма жамоаси гуруҳ босқичида бир ғалаба, икки дуранг ва бир мағлубият қайд этди. Вакилларимиз ўрин олган гуруҳда Уммон терма жамоаси 12 очко билан 1-ўринни эгаллади. Ўзбекистон ва мезбон Таиланд терма жамоалари эса бир хил – 5тадан очко жамғаришди. Фақат тўплар нисбатига кўра ҳамюртларимиз гуруҳда 3-ўринни эгаллашди. Кейинги ўринлар мос равишда Гонконг ҳамда Қозоғистон терма жамоаларига насиб этди.

Бугун ўтказилган плей-офф босқичида терма жамоамиз аъзолари Сингапур устидан ғалабага эришди ва мустақил Ўзбекистон тарихида илк маротаба ХIХ ёзги Осиё ўйинларининг финал босқичига йўлланмани қўлга киритишди.

Олдинда вакилларимизни Шри-Ланка терма жамоасига қарши ўйин кутиб турибди. Мазкур ўйинда қандай натижа қайд этилишидан қатъи назар Ўзбекистон хоккейчилари ХIХ ёзги Осиё ўйинларида қатнашади.

• Чим устида хоккей
• Олимпиада
• Ўзбекистон