Президент матбуот котиби Шерзод Асадов Нью-Йорк шаҳрида БМТ бош котибининг ёрдамчиси – БМТ матбуот котиби Стефан Дюжаррик билан учрашув ўтказди.

Мулоқот чоғида томонлар Ўзбекистон ва Бирлашган Миллатлар Ташкилоти ўртасидаги ҳамкорликни янада мустаҳкамлаш масалаларини муҳокама қилган. Хусусан, қўшма тадбирлар ва олий даражадаги ташрифларни ёритиш жараёнида Ўзбекистон ва БМТ ахборот хизматлари ўртасида яқин ҳамкорлик йўлга қўйилгани, ўзаро қўллаб-қувватлаш анъанага айлангани таъкидланган.

Шунингдек, учрашувда журналистлар ўртасида тажриба алмашиш, уларнинг малакасини оширишга қаратилган қўшма лойиҳалар истиқболлари муҳокама қилинган. Бу борада БМТнинг турли тузилма ва институтлари имкониятларидан фойдаланиш муҳимлиги қайд этилган.

Шерзод Асадов Ўзбекистон оммавий ахборот воситалари вакиллари БМТ ташаббусларини кенг ёритишда фаол иштирок этишини қўллаб-қувватлашга тайёрлигини билдирган.

Шерзод Асадов, шунингдек, Нью-Йорк шаҳрида бугун БМТ бош котибининг глобал коммуникациялар бўйича ўринбосари Мелисса Флеминг билан учрашув ўтказган эди. Учрашувда БМТ доирасидаги Барқарор ривожланиш мақсадларини илгари суриш, ёлғон ахборот тарқалишига қарши курашиш ва ёшларни глобал ташаббусларга жалб этишга қаратилган муҳим лойиҳалар ва кампаниялар муҳокама қилинган.

• БМТ
• Sherzod Asadov
• uchrashuv