Ўзбекистонда содир этилаётган кибержиноятларнинг 90 фоизи чет давлатлардан туриб амалга оширилмоқда. Бу ҳақда Ички ишлар вазири ўринбосари, полковник Рамазон Ашропов Ўзбекистон аҳолисига қилган мурожаатида маълум қилди.

Унинг таъкидлашича, бугунги кунда содир этилаётган деярли ҳар иккита жиноятнинг биттаси ахборот технологиялари орқали амалга оширилмоқда. Кибержиноятларнинг асосий қисми трансчегаравий хусусиятга эга.

Рамазон Ашроповнинг қайд этишича, кибержиноятларга қарши курашишда фақат ҳуқуқни муҳофаза қилувчи органларнинг саъй-ҳаракати етарли эмас. Унинг сўзларига кўра, фирибгарлар фуқароларнинг соддалиги, бепарволиги ва рақамли саводхонлиги етарли эмаслигидан фойдаланмоқда.

Ички ишлар вазири ўринбосари фуқароларни ижтимоий тармоқлардан келган шубҳали, айниқса APK форматидаги файлларни очмаслик ва юклаб олмасликка чақирди. Шунингдек, нотаниш рақамлардан қўнғироқ қилиб, ўзини идора ходими сифатида таништирган шахсларга ишонмаслик, телефон орқали бериладиган код ва паролларни айтмаслик тавсия этилди.

Бундан ташқари, фуқароларга пулни қисқа муддатда бир неча баробар кўпайтиришни ваъда қилувчи сохта онлайн платформалардан эҳтиёт бўлиш, онлайн савдоларда сотувчининг ишончлилигига ишонч ҳосил қилмасдан олдиндан тўлов қилмаслик ҳамда банк картаси ПИН-коди ва телефонга келган СМС-кодни ҳеч кимга бермаслик тавсия қилинди.

Расмийларнинг мурожаатида киберхавфсизлик қоидаларига риоя қилиш ва бу борадаги маълумотларни оила аъзолари, фарзандлар ҳамда кексаларга етказиш муҳимлиги таъкидланди.