Бугун, 26 апрел куни Шавкат Мирзиёев раислигида туризм хизматлари кўламини кенгайтириш ва инфратузилмасини ривожлантириш бўйича видеоселектор бўлиб ўтмоқда.

Айни вақтда давом этаётган видеоселекторда давлат раҳбари “Андижон полкаси” рақсини ЮНЕСКО номоддий маданий мерос рўйхатига киритиш ташаббусини қўллаб-қувватлади.

Қайд этилишича, бу йил “Андижон полкаси” – ўзбек халқ чолғу куйи ва рақсининг 100 йиллиги кенг нишонланади. Бу рақс нафақат андижонликларнинг, балки  кўпмиллатли Ўзбекистоннинг энг севимли ва жўшқин рақсларидан бири ҳисобланади. Миллий куй ва рақснинг энг яхши  анъаналарини акс эттирадиган “Андижон полкаси” оҳанглари билан бутун авлодлар улғайган, одамларнинг хурсандчилик хотиралари шу рақс билан боғланган, ҳар бир хонадондаги тўй-ҳашамнинг энг авж нуқтаси шу шўх куй ва рақссиз ўтмайди. 

Видеоселекторда “Андижон полкаси” ҳар жиҳатдан жаҳон маданий мероси деб аташга лойиқ эканлиги, уни ЮНЕСКО номоддий маданий мерос рўйхатига киритиш бўйича таклиф бериш ташаббуси ўртага ташланди.

Давлат раҳбари ушбу ташаббусни қўллаб-қувватлади.

Эслатиб ўтамиз, аввалроқ ижтимоий тармоқларда Андижон вилояти ҳокимининг “ким ўзини ҳақиқий андижонлик деб билса, ҳар куни Андижон полкасига рақсга тушиши керак” деган мазмундаги топшириғи акс этган “Хабарнома”си тарқалган эди.

• Андижон полькаси
• Президент
• Шавкат Мирзиёев
• Видеоселектор