Қашқадарё вилоятининг Касби туманида 3 ёшли қиз ўгай онаси томонидан урилиши оқибатида вафот этди. Бу ҳақда Болалар омбудсмани хабар берди.

Маълум қилинишича, 26-сентабр куни И.С. (1994 йилда туғилган аёл) турмуш ўртоғи Н.А. билан низолашиб, унинг 2022 йилда туғилган вояга етмаган қизи О.Ш.ни урган. Бола бош қисмидан оғир жароҳат олган ва шу куннинг ўзида вафот этган.

Ҳолат юзасидан 27-сентабр куни Касби тумани ИИБ Тергов бўлими томонидан Жиноят кодексининг 126-моддаси 8-қисми «г» банди билан жиноят иши қўзғатилган. И.С. Жиноят-процессуал кодексининг 221-моддасига асосан гумонланувчи сифатида ушланган. Ҳозирда дастлабки тергов ҳаракатлари олиб борилмоқда.

Болалар омбудсмани мазкур жиноят иши юритилиши устидан кузатувни давом эттиришини билдирган. Қонунчиликка кўра, ушбу жиноят учун 10 йилдан 12 йилгача озодликдан маҳрум қилиш жазоси белгиланган. Қўшимча маълумотлар тергов натижаларига кўра тақдим этилиши айтилган.