Ўқитувчи ва мураббийлар билан учрашувда дунёда билим яратиш, ахборот тарқатиш ва меҳнат қилиш усуллари жадал ўзгараётгани қайд этилди. Сунъий интеллект матн тайёрлаши, дастур ёзиши ва маълумотларни таҳлил қилиши мумкин. Бироқ ҳеч бир технология боланинг қалбига устоздек йўл топиб, унда Ватанга муҳаббат ва масъулият туйғусини шакллантира олмаслиги таъкидланди.

Учрашувда Президент Шавкат Мирзиёев таълим ва илм-фан фидойиларининг бир гуруҳини давлат мукофотлари билан тақдирлаш тўғрисидаги фармонни имзолаганини маълум қилди. Мукофот соҳиблари орасида педагоглар билан бирга таълим ривожига ҳисса қўшаётган тадбиркорлар ва хорижлик ҳамкорлар ҳам бор. Тадбир давомида давлат мукофотлари ўз эгаларига топширилди.

Шавкат Мирзиёев мукофот соҳибларини табриклар экан, «Ишонинг, мен уларни кўксингизга тақиб, сизлардан ҳам кўпроқ хурсанд бўляпман», — деди.

Шунингдек, таълимнинг барча бўғинларидаги илғор педагогларни рағбатлантириш мақсадида жадид бобомиз Абдулла Авлоний номидаги алоҳида давлат мукофотини таъсис этиш таклиф қилинди. Унинг илк соҳибларини келаси йилги байрам арафасида эълон қилиш ва тақдирлаш кўзда тутилмоқда.