Янги тадқиқотга кўра, Қуёш тизимининг ташқи сайёралари — Юпитер, Сатурн, Уран ва Нептун — Қуёш оқ митти юлдузга айланганидан тахминан бир миллиард йил ўтиб орбитал беқарорликка дуч келиши мумкин. Аввалги ҳисоб-китобларда эса бу жараён квинтиллион йиллар давом этиши мумкинлиги тахмин қилинган эди.

Калифорния технология институти тадқиқотчилари Қуёшнинг массасини йўқотиши сайёралар орбиталарига қандай таъсир қилишини ўрганди. Уларнинг маълум қилишича, Қуёш қизил гигантга айланиш жараёнида массасининг катта қисмини йўқотади ва кейинчалик оқ митти юлдузга айланади. Бу даврда Меркурий ва Венеранинг Қуёш томонидан ютилиши, Ернинг эса ҳалокатга учраши кутилмоқда. Марс эса Қуёшдан узоқроқ жойлашгани сабаб сақланиб қолиши мумкин.

Тадқиқот доирасида Қуёш, Юпитер, Сатурн, Уран ва Нептунни ўз ичига олган виртуал модель яратилиб, юзлаб симуляциялар ўтказилган. Суперкомпютерлар ёрдамида уларнинг миллиардлаб йиллар давомида ҳаракати ҳисоблаб чиқилган. Тадқиқотчилар Қуёш массасининг камайиши бир текис эмас, балки «стохастик туртки» деб аталувчи тасодифий ва кучли ўзгаришлар орқали кечишини аниқлаган.

Қуёш тизими тахминан 4,57 миллиард йил аввал шаклланган. Қуёшнинг қизил гигант босқичига ўтишигача яна қарийб 5 миллиард йил бор. Янги тадқиқот натижалари The Astrophysical Journal Letters журналида «Терминал Instability of the Solar System Triggered by Stochastic Solar Mass Loss» номли мақолада эълон қилинган. Тадқиқотда сунъий интеллект воситаларидан фойдаланилмаган.