Дунёдаги энг қурғоқчил ҳудудлардан бири ҳисобланган Чилининг Атакама чўлида 2026 йил бошидаги кучли ёмғирлардан сўнг 200 дан ортиқ ўсимлик тури гуллади. Ноёб табиат ҳодисаси маҳаллий ва хорижий сайёҳларнинг ҳудудга қизиқишини оширди.

Чилининг Миллий ўрмончилик корпорацияси вакили Ҳорҳе Карабантеснинг маълум қилишича, чўлда ғайритабиий даражада кўп намлик тўпланиши ўсимликларнинг кенг миқёсда ўсишига сабаб бўлган. Унинг сўзларига кўра, бу бошқа ҳудудлардаги одатий гуллаш жараёнларидан фарқ қиладиган ноёб ҳодисадир.

Июль ва август ойларида Чилининг бир қатор ҳудудларида рекорд даражада ёмғир ёққан. Айрим жойларда ёғингарчилик миқдори 1950 йиллардан бошланган метеорологик кузатувлар давридаги энг юқори кўрсаткичга етган. Расмийлар бундай об-ҳаво шароитларини Эл Нино иқлим ҳодисаси ва ундан кейинги ҳарорат кўтарилиши билан боғламоқда.

Эл Нино Тинч океанининг экваториал қисмидаги сув ҳароратининг одатдагидан юқори даражага кўтарилиши билан боғлиқ иқлим ҳодисасидир. У дунёнинг турли ҳудудларида қурғоқчилик, кучли ёмғир, тошқин ва бошқа экстремал об-ҳаво ҳодисаларини келтириб чиқариши мумкин. Мазкур маълумотлар AP News хабарига асосланган.