Кеча, 22 февраль куни Италиянинг Милан ва Кортина-д’Ампеццо шаҳарларида ўтказилган XXV қишки Олимпия ўйинлари расман якунланди. Мусобақалар доирасида 116 та медаллар жамланмаси ўйналди.

Умумий медаллар ҳисобида Норвегия терма жамоаси биринчи ўринни эгаллади. Скандинавияликлар 18 та олтин, 12 та кумуш ва 11 та бронза медалига эга чиқди. Жами 41 та медаль билан норвегияликлар қишки Олимпиада тарихида энг кўп мукофот жамғарган жамоа сифатида янги рекорд ўрнатди.

Аввалги рекорд ҳам шу мамлакат спортчиларига тегишли эди — 2018 йили Жанубий Кореянинг Пёнгчанг шаҳрида ўтган олимпия ўйинларида улар 39 та медаль жамғаришганди. Норвегия кетма-кет тўртинчи бор медаллар ҳисобида етакчиликни қўлга киритди. Милан ва Кортина-д’Ампеццо мезбонлик қилган мусобақа тарихий натижалар билан йодда қолди.

Медаллар жадвалида иккинчи ўринни АҚШ эгаллади. Америкалик спортчилар 12 та олтин, 12 та кумуш ва 9 та бронза медали қўлга киритди. Учинчи поғонадан ўрин олган Нидерландия терма жамоаси ҳисобида эса 10 та олтин, 7 та кумуш ва 3 та бронза медаллари мавжуд.

Мезбон Италия терма жамоаси 10 та олтин, 6 та кумуш ва 14 та бронза медали билан тўртинчи бўлди. Ўйинлар Европа қитъасида ўтказилганига қарамай, медаллар тақсимотида скандинавияликлар устунлик қилди. Байроқсиз қатнашган россиялик спортчилар фақат битта кумуш медаль билан кифояланишди. Қозоғистон эса 1994 йилдан буён ўзининг иккинчи олтин медалини қўлга киритди.

Маълумот учун, 2030-йилги қишки олимпиада Франция Алп тоғларида бўлиб ўтади.

• Италия
• милан
• Қишки Олимпиада