Туркиянинг Анталия вилояти Кепез туманида 2026-йил 26-октябрь куни соат 23:00 атрофида юз берган торнадо оқибатида беш нафар қурилиш ишчиси ҳалок бўлди, яна бир киши жароҳатланди. Бу ҳақда “Ҳаберлер” хабар берди.

Ҳодиса Кепез туманининг Февзи Чақмоқ маҳалласидаги қурилиш майдонида содир бўлган. Кучли шамол ишчилар яшаши учун мўлжалланган иккита контейнерни ағдариб, вайрон қилган. Оқибатда контейнерлар ичидаги ишчилар ташқарига улоқтирилган.

Дастлаб икки киши ҳодиса жойида ҳалок бўлган. Шифохонага олиб борилган яна уч нафар ишчи кейинчалик вафот этган. Жароҳатланган бир кишининг аҳволи яхши экани маълум қилинган.

Анталия вилояти ҳокими Ҳулуси Шаҳиннинг айтишича, ҳудудда кам учрайдиган, “ҳужайравий торнадо” деб аталадиган табиий ҳодиса юз берган. Унинг билдиришича, торнадо фақат шу жойда кузатилган, яқин атрофдаги бошқа контейнерларга зарар етмаган.

Табиий офат оқибатида қурилиш майдонидаги катта кран ҳам қулаган. Бироқ кран қулаши натижасида ҳеч ким ҳалок бўлмаган ёки жароҳатланмаган.

Ҳодиса жойида қутқарув-қидирув ишлари олиб борилиб, вайроналар остида қолган ёки жароҳатланган бошқа одамлар бор-йўқлиги текширилган. Ҳалок бўлганларнинг шахсини аниқлаш ишлари ҳам давом эттирилган.