Россиянинг Амур вилоятида Ту-95 стратегик бомбардимончи самолёти ўқув-машғулот парвози вақтида ҳалокатга учради. Экипажнинг олти нафар аъзоси ҳалок бўлган, яна бир киши жароҳатланган. Бу ҳақда Россия Мудофаа вазирлигига таяниб, «ТАСС» хабар берди.

Ҳодиса 29 сентябрь куни аҳоли яшамайдиган ҳудудда юз берган. Ракета ташувчи самолёт ўқув парвозини ўқ-дориларсиз амалга оширган. Жароҳатланган экипаж аъзоси тиббиёт муассасасига олиб кетилган.

Ҳалокат сабабларини аниқлаш учун Россия Аэрокосмик кучлари комиссияси воқеа жойига юборилган. «Маш» Telegram канали самолёт ҳавога кўтарилганидан бир неча дақиқа ўтиб қулаганини ёзган. «База» Telegram канали эса ҳалокатга самолётдаги ёқилғининг портлаши сабаб бўлган бўлиши мумкинлигини тахмин қилган. Самолёт ҳалокат жойидан қарийб 50 километр узоқликдаги «Украинка» аэродромига тегишли экани айтилмоқда.

Ту-95 — Совет Иттифоқида ишлаб чиқарилган турбовинтли стратегик бомбардимончи-ракета ташувчи самолёт бўлиб, узоқ масофаларга оддий ва ядровий қуролларни ташишга мўлжалланган. Аввалроқ, 15 июнь куни Иркутск вилоятида Россиянинг Ту-22М3 самолёти ҳам ўқув-машғулот парвози вақтида ҳалокатга учраган эди. Ўша ҳодисада экипаж аъзолари катапульта қилишга муваффақ бўлган.